Quick Links
Byaheng San Pablo-Calamba ng PNR, aarangkada na bukas / Pebrero 9
Manunumbalik na ang byahe ng Philippine National Railways (PNR) sa linyang San Pablo City patungong Calamba, Laguna simula bukas, Pebrero 9, matapos ang masusing rehabilitasyon at pagpapatibay ng mga tulay sa Biñan at Tarapichi.
Tutulak sa ganap na alas 6:23 ng umaga ang unang biyahe ng PNR train galing sa San Pablo na tatawid sa 32.62 kilometrong riles patungong Calamba.
Ang huling byahe ng nasabing linya ay magmumula naman sa Calamba patungong San Pablo sa ganap na alas 6:30 ng gabi.
Sa kaugnay na kaganapan sa PNR, ibinalik na rin noong Miyerkules, Pebrero 1, ang biyaheng Tutuban-Calamba na siyang nasisilbing daan sa mga pasahero mula Laguna na makabiyahe papuntang Kalakhang Maynila, at pabalik.
Siniguro ni PNR General Manager Jeremy S. Regino na kumpunihin, ayusin, at mas patibayin ang mga tulay na dinaraanan ng tren na nagkokonekta sa mga probinsya upang mapanumbalik ang mga nasabing biyaheng San Pablo-Calamba at Calamba-Tutuban ng PNR.
Inatasan din ni GM Regino ang mga inhinyero ng PNR na gawing mas masigasig ang regular maintenance at masiguro ang tibay ng mga tulay sa panahong may kalamidad.
Noong Huwebes, Pebrero 2, personal na binisita at ininspeksyon ni GM Regino ang mga tulay ng Biñan at Palicpic – Ayungin kung saan nilakad at tinawiran niya at masusing siniyasat ang mga kinumpuni ng PNR Engineering Department. ##
Extended operating hours ng PNR hanggang Enero 15 na, bilang pakikiisa sa Pista ng Nazareno
MANILA – Ang kasalukuyang extended operating hours ng Philippine National Railways ay mas pinalawig hanggang Enero 15, bilang pakikiisa sa Pista ng Mahal na Poong Nazareno.
Ipagpapatuloy ang extended operating hours, bilang paghahanda sa pagdagsa ng mga pasahero at deboto ng Nazareno, sa darating na pista sa Enero 9.
Dapat natapos noong Enero 4 ang extended operating hours ng PNR na isinagawa dahil sa panahon ng kapaskuhan.
Nagpasya ang mga opisyal ng PNR na palawigin hanggang Enero 15 at inilatag ang “Oplan Biyaheng Ayos: Black Nazarene 2023” kung saan magkakaroon ng mas pina-igting na seguridad mula Enero 8 hanggang Enero 9.
Dahil sa tuloy-tuloy na mas pinahabang oras ng operasyon, pananatilihin ng PNR ang regular nitong mga byahe na aabot hanggang 9:16 ng gabi na tutulak mula Tutuban patungong Alabang.
Bukod sa pagpapalawig ng oras ng operasyon, naglatag din ang PNR mga emergency medical assistance na tutulong sa mga mangangailangan.
Dahil sa inaasahang dagsa ng mga pasahero, nagtalaga rin ang PNR ng karagdagang security personnel upang masiguro ang ligtas, komportable, at maayos ang daloy ng mga pasehero.
Mayroon ding mga nakahandang miyembro ng Philippine National Police (PNP) sa istasyon ng Tutuban upang tumulong sa operasyon.
Sa may emergency situation, maaring tumawag sa PNR Hotline 5319-0044.
Alinsunod sa health and safety protocols ng Department of Health, mahigpit na ipinapatupad rin ng PNR ang tamang pagsuot ng face masks sa loob ng istasyon sa lahat ng oras. ###
